त्रिभुवन आर्मी क्लबले विभागीय डर्बीमा नेपाल पुलिस क्लबलाई ४–१ को जितसँगै राष्ट्रिय लिगमा आफ्नो छैठौं जित हासिल गरेको छ। सोमबार त्रिपुरेश्वरस्थित दशरथ रंगशालामा सम्पन्न खेलमा आर्मीले लगातार अंक जोड्दै ९ खेलबाट २० अंक बनाएको छ भने पुलिसको पाँचौं हारसँगै अंक ८ मा सीमित भएको छ।
खेलको १८औं मिनेटमा आर्मीको जिलेस्पी झाङ कार्कीको क्रसमा निराजन धामीको हेडर पोललाई छोएर बाहिरियो। त्यसको दुई मिनेटपछि पुलिसका धिरेन्द्रबहादुर शाहले पेनाल्टीबाट प्रहार गरे पनि आर्मीका गोलकिपर विकेश कुथुले उत्कृष्ट बचाउ गरेका थिए।
३०औं मिनेटमा निराजन धामीले गोल गर्दै आर्मीलाई अग्रता दिलाए। तर ४२औं मिनेटमा दशरथ गिरीले गोल गर्दै पुलिसलाई खेलमा फर्काए। दोस्रो हाफमा आर्मीले आफ्नो खेल पकड्दै ५६औं मिनेटमा पेम्बा दोर्जे, ७०औं मिनेटमा निराजनको दोस्रो गोल र इन्जुरी समयमा किरण सुनारको गोलमार्फत ४–१ को जीत सुनिश्चित गर्यो।
यो जीतसँगै आर्मी लिगमा शीर्ष स्थानमा आफ्नो दाबी बलियो बनाएको छ।