नराम्रो सपना वा डर लाग्दो सपना केवल मानसिक असुविधा मात्र नभएर शारीरिक स्वास्थ्य समस्याको प्रारम्भिक संकेत पनि हुन सक्छ। वैज्ञानिक अनुसन्धान अनुसार, यस्तो सपना मिर्गौला, मुटु, फोक्सो तथा न्युरोलोजिकल रोगसँग सम्बन्धित हुन सक्छ। अनुसन्धानकर्ताहरूले बताएका छन् कि मस्तिष्कले निद्राको र्यापिड आइ मुभमेन्ट (रेम) चरणमा मात्र सपना देखाउँछ। तर अनिद्रा, मानसिक तनाव, गहिरो निद्रामा बाधा, वा शारीरिक समस्या भएका व्यक्तिहरूलाई डरलाग्दा सपना बढी देखिन्छ।
नराम्रो सपना देख्ने मानिसमा मुटुको चाल अनियमित हुने सम्भावना तीन गुणा बढी हुन्छ भने छाती दुख्ने समस्या सात गुणा बढी देखिन्छ। साथै, मुटु वा फोक्सोमा समस्या भएका व्यक्तिले निद्रामा फोक्सोमा पानी जम्दा श्वासप्रश्वासमा कठिनाई महसुस गर्ने र त्यसले डर लाग्दो सपना उत्पन्न गर्न सक्छ।
कसैलाई मिर्गौला संक्रमण, रुघाखोकी, माइग्रेन वा न्युरोलोजिकल रोग, जस्तै पार्किन्सन रोग भएमा पनि नराम्रो सपना देखिने वैज्ञानिकहरूले देखाएका छन्। महिलाहरू रजस्वला वरिपरि विभिन्न प्रकारका सपना अनुभव गर्न सक्छन्।
मानसिक स्वास्थ्य पनि सपनामा असर गर्छ। नकारात्मक सोच, तनाव, डिप्रेसन, एन्जाइटी, अप्रिय घटना, वा सामाजिक कठिनाइका अनुभवहरूले बारम्बार नराम्रो सपना देखाउने मुख्य कारण बन्न सक्छ। डरलाग्दा सपना हाम्रो अवचेतन मनमा जम्मा भय, चिन्ता र पीडा बाहिर ल्याउने माध्यम पनि हो।
विशेषज्ञहरूको सल्लाह अनुसार, बारम्बार नराम्रो सपना देखिनु स्वास्थ्य समस्याको चेतावनी हुन सक्छ। समयमै निद्रा, मानसिक स्वास्थ्य र शारीरिक स्वास्थ्यको व्यवस्थापन नगरेको खण्डमा यस्ता सपना दीर्घकालीन स्वास्थ्य जोखिम पनि निम्त्याउन सक्छ।
सुझाव:
.पर्याप्त निद्रा सुनिश्चित गर्नुहोस्
.मानसिक स्वास्थ्यमा ध्यान दिनुहोस्, तनाव घटाउने उपाय अपनाउनुहोस्
.शारीरिक स्वास्थ्य नियमित जाँच गराउनुहोस्
.अत्यधिक डर वा चिन्ताले लगातार सपना बाधा पुर्याउँछ भने विशेषज्ञसँग परामर्श लिनुहोस्