जनवरी महिनामा जर्मनीको औद्योगिक उत्पादन र अर्डरहरू अपेक्षाभन्दा कमजोर देखिएपछि चान्सलर फ्रेडरिक मर्जमाथि युरोपको सबैभन्दा ठूलो अर्थतन्त्रलाई पुनर्जीवित गर्ने दबाब बढेको छ।
सङ्घीय तथ्याङ्क कार्यालय डेस्टाटिसका अनुसार जनवरीमा जर्मनीको औद्योगिक उत्पादन ०.५ प्रतिशतले घटेको छ। यसअघि विश्लेषकहरूले भने ०.९ प्रतिशतले वृद्धि हुने अनुमान गरेका थिए।
यसैगरी औद्योगिक अर्डरहरूमा ११.१ प्रतिशतको ठूलो गिरावट आएको छ, जुन फ्याक्टसेटको विश्लेषक सर्वेक्षणमा अपेक्षित ५.२ प्रतिशतभन्दा धेरै बढी हो। यसले जर्मनीको उद्योग क्षेत्रमा माग कमजोर बन्दै गएको स्पष्ट संकेत दिएको छ।
सार्वजनिक ऋणदाता संस्था केएफडब्लुका अर्थशास्त्री डर्क शुमाकरले यी तथ्याङ्कलाई निराशाजनक भन्दै उद्योग क्षेत्रको अवस्था अझै चुनौतीपूर्ण रहेको बताएका छन्। उनका अनुसार अर्डरमा आएको गिरावटले उद्योग क्षेत्रको वृद्धि अझै कमजोर रहेको देखाएको छ।
सन् २०२६ को सुरुआती महिनाहरूमा केही सकारात्मक आर्थिक संकेत देखिए पनि जनवरीको तथ्याङ्कले उद्योग क्षेत्रको सुधार निकै कमजोर रहेको देखाएको छ। यसले अर्थतन्त्रलाई गति दिने प्रतिबद्धता जनाएका चान्सलर फ्रेडरिक मर्जका लागि थप चुनौती सिर्जना गरेको विश्लेषकहरूको भनाइ छ।
शुमाकरका अनुसार सरकारले रक्षा लगायतका क्षेत्रमा खर्च बढाएपछि केही उद्योगमा सुधार देखिएको छ। तर यसले समग्र उद्योग क्षेत्रमा व्यापक वृद्धि ल्याउन भने पर्याप्त नभएको उनको भनाइ छ। कोभिड–१९ महामारीपछि जर्मनीको अर्थतन्त्र अपेक्षाकृत सुस्त गतिमा अघि बढिरहेको छ। जनवरीमा सरकारले सन् २०२६ का लागि आर्थिक वृद्धिको अनुमान घटाएर १ प्रतिशतमा झारेको छ।