नेकपा एमालेका अध्यक्ष ८८केपी शर्मा ओली८८ले राज्य र उम्मेदवारहरूद्वारा अर्बौं रुपैयाँ खर्च भइसकेको भन्दै अब निर्धारित समयमै निर्वाचन हुनुपर्ने बताएका छन्। अध्यक्ष ओलीले चुनाव स्थगित गर्न अझै पनि विभिन्न प्रयास भइरहेको दाबी गर्दै भने कि एमाले कुनै अलमलमा नपरी चुनाव जित्ने तयारीमा लागिसकेको छ।
“हामी अब चुनाव होस् भन्ने पक्षमै छौं। चुनाव स्थगित हुन पनि सक्छ, अहिले पनि प्रयास भइराखेका छन्। हुन्छ भने होस् जेसुकै होस्, तर हामी नअलमलिकन चुनावको तयारीमा लाग्छौं। चुनावको विजयको तयारीमा लाग्छौं। हामीले जित्नै पर्छ। अब कुनै अलमल गर्नु हुँदैन।” अध्यक्ष ओलीले विगत ६ महिनासम्म आफ्नो पार्टीले चुनावको तयारीमा पहल गर्दा कसैले चासो नदिएको र अन्तिम समयमा चुनाव नहुने भन्ने दाबी गर्नु गलत भएको बताए।
“६ महिना हामीले कोशिस गर्यौं। अब जब समय सिद्धियो त्यतिबेला ‘अब चुनाव हुँदैन’ भन्नु हुँदैन। देशको खर्च नहुनु पर्थ्यो – अर्बौं खर्च त भइ सक्यो। उम्मेदवारको खर्च नहुनु पर्थ्यो – भइ सक्यो।”
यसैबीच, ओलीले राष्ट्रिय स्वतन्त्र पार्टीलाई लक्षित गर्दै आलोचना गरेका छन्। उनले सो पार्टीलाई ‘जोडजामवाला, सानो भाँडोमा दुध उमालेर तलबाट चर्को आगो बालेर उम्लिएको’ जस्ता शब्दहरूमा तुलना गर्दै कुनै आधार नभएको दाबी गरे।
“जित्दैनौं भन्ने परेछ क्यारे, अब अर्काका झण्डा जलाउने, निहुँ खोज्ने, वातावरण बिथोल्न खोज्ने, अपमान गर्ने, बेइज्जत गर्ने कामहरू सुरू गरेको छ।”
ओलीको यो वक्तव्यले निर्वाचन समयमै सम्पन्न गर्ने पक्ष र एमालेको रणनीतिक तत्परता स्पष्ट पार्दै राजनीतिक परिदृश्यमा आगामी गतिविधिहरूको संकेत दिएको छ।