काठमाडौं। एपीएफ फुटबल क्लबलाई राष्ट्रिय लिगमा प्लानिङ बोइज युनाइटेडले रोकेको छ। त्रिपुरेश्वरस्थित दशरथ रंगशालामा सोमबार सम्पन्न खेलमा एपीएफ र प्लानिङले १–१ गोलको बराबरी खेल्दै अंक बाँडेको छ। एपीएफको यो तेस्रो बराबरी हो।
लिगमा ९ खेल खेलेको एपिएफको २१ अंक जोडेको छ। प्लानिङको भने चौथो यो बराबरी हो। प्लानिङको भने १० खेलबाट १९ अंक छ। २२औं मिनेटमा कप्तान युवराज खड्काको गोलमा एपीएफले सुरूआती अग्रता लिएको थियो। ३५औं मिनेटमा एपीएफका प्रदीप लामाले दिएको पासलाई अनिश घर्ती क्षेत्रीले गरेको प्रहार पोस्टपट्टिको पोल छोएर बाहिरियो। पहिलो हाफको इन्जुरी समयमा एपीएफको मणिकुमार लामाले पेनाल्टी बक्स भित्रबाट गरेको प्रहरले लक्ष्य लिन सकेन।
४७औं मिनेटमा प्लानिङका एलेक्स विल्लानेले प्रहार गर्दा रिबाउन्डमा आएको बललाई पापा ईबू केबेले गोलमा परिणत गर्न सकेन। ६०औं मिनेटमा केबेले प्रहार गरेको फ्रिकिक रिबाउन्ड भएपछि एपीएफले गरेको काउन्टर अट्याक सफल हुन सकेन। त्यसैको फाइदा उठाउँदै एलेक्स विल्लानेले उत्कृष्ट गोल गर्दै प्लानिङलाई खेलमा फर्काए। ८८औं मिनेटमा प्रतापसिंह राईको क्रसमा केबेले बाई साइकल किक प्रहार गर्दा सिधै एपीएफका गोलकिपर एञ्जल श्रेष्ठको हातमा लागेर गोल पुग्यो। इन्जुरी समयमा सुमन श्रेष्ठले रेड कार्ड पाएपछि एपीएफ १० खेलाडीमा सीमित भयो। श्रेष्ठले मुख्य रेफ्रीलाई हात लगाएपछि उनले रेड कार्ड पाएका हुन्।