तेहरान । इरान–टर्की सीमामा हाल दैनिक करिब एक हजार इरानी नागरिक प्रवेश गरिरहेका छन्, तर संख्या उल्लेखनीय रूपमा बढेको छैन। सीमा क्षेत्रमा भेटिएका अधिकांश मानिस द्वन्द्व र शासन व्यवस्थाबारे खुलेर बोल्न डराइरहेका छन्। उनीहरूले पत्रकारहरूसँग कुरा नगर्न फोनमार्फत चेतावनी पाएको दाबी गरेका छन्।
सीमामा भेटिएका नागरिकहरूले युद्ध र राजनीतिक तनावका कारण आफ्नो जीवन र रोजगारीमा गम्भीर असर परेको बताए। तेल उद्योगमा कार्यरत एक इरानी–क्यानाडेली इन्जिनियरले निगरानीमा परेको डर व्यक्त गर्दै, टर्कीमा पुगेपछि पनि खुला रूपमा कुरा गर्न हिचकिचाएको बताए।
एक युवाले इस्तानबुलमा आफ्नी पत्नी र छोरासँग पुनर्मिलनका लागि सीमापार यात्रा गरिरहेको बताए। उनले आफ्नो कम्पनीमाथि बम आक्रमण भएपछि जागिर गुमाउनुपरेको र हवाई आक्रमणमा कार नष्ट भएको बताए। उनले भावुक हुँदै भने, “म किन आफ्नो देश छोड्न बाध्य हुनुपर्छ? पछिल्ला दुई दिनदेखि म लगातार रोइरहेको छु।”
उक्त युवाले अमेरिकी राष्ट्रपति डोनाल्ड ट्रम्पलाई सन्देश दिँदै युद्ध तत्काल रोकिने र सर्वसाधारणलाई क्षति नपुग्ने व्यवस्था गर्न आग्रह गरेका छन्।सीमामा भेटिएका अनुभवहरूले देखाएको छ कि युद्धको प्रत्यक्ष असर सामान्य नागरिकको जीवनमा परेको छ। आर्थिक असुरक्षा, रोजगारी गुम्नु, घरबारको क्षति, र व्यक्तिगत सुरक्षा चुनौतीहरूले धेरैलाई आफ्नो देश छोडेर सुरक्षित जीवन खोज्न बाध्य बनाएको छ। विशेषज्ञहरूले यस परिस्थितिलाई मानविय संकटका रूपमा विश्लेषण गर्दै अन्तर्राष्ट्रिय समुदायसँग तत्काल राहत, सुरक्षा र राजनीतिक समाधानको माग गरिरहेका छन्।